काठमाडौं ।
आयोजक भारतले साफ यू-२० च्याम्पियनसिप फुटबलमा पहिलो जित निकालेको छ । भुवनेश्वरस्थित कालिंगा स्टेडियममा शुक्रबार श्रीलंकालाई ४-० गोल अन्तरले हराउँदै भारतले पहिलो जित निकालेको हो ।
साविक विजेता समेत रहेको भारतलाई जित दिलाउन पार्थिव सुन्दर गोगाईले दुई गोल गरे । हिमान्सु जान्ग्रा र गुर्किरात सिंहले एक एक गोल थपे । भारतले चारै गोल दोस्रो हाफमा गरेको थियो ।
खेलको ५० औं मिनेटमा हिमान्सुले गोल गर्दै टोलीलाई अग्रता दिलाएका थिए । खेलको ६९ औं मिनेटमा पार्थिव सुन्दर गोगोईले गोल गर्दा भारत २-० ले अघि रह्यो ।
७४ औं मिनेटमा गुर्किरातले गोल गर्दै टोलीको अग्रता ३-० को बनाए । त्यसपछि खेलको इन्जुरी समयमा पार्थिवले व्यक्तिगत दोस्रो गोल गर्दै भारतलाई ४-० को जित दिलाए ।
जितसँगै भारतले दुई खेलमा ३ अंक जोडेको छ । पहिलो खेलमा भारत बंगलादेशसँग पराजित भएको थियो । श्रीलंकाको यो लगातार तेस्रो हार हो । श्रीलंका भने प्रतियोगिताबाट बाहिरिएको छ ।
नेपाल २ म्याचमा ६ अंकसाथ शीर्ष स्थानमा छन्। बंगलादेश पनि २ खेलमा ६ अंकसहित दोस्रो स्थानमा रहेको छ। गोलअन्तरमा नेपाल अघि छ। प्रतियोगिताको समूह चरणबाट शीर्ष २ टोलीले फाइनल खेल्नेछन्। नेपालले अब ३१ जुलाईमा भारत र २ अगस्टमा बंगलादेशसँग खेल्नेछ। फाइनल ५ अगस्टमा हुनेछ।
नेपालले मैत्रीपूर्ण फुटबल म्याच खेल्ने, यी ३ देशबाट आयो प्रस्ताव
नेपाली राष्ट्रिय फुटबल टिमले मैत्रीपूर्ण खेल खेल्ने पक्का भएको छ। राष्ट्रिय फुटबल टिमले आगामी सेप्टेम्बर महिनामा मैत्रीपूर्ण खेल खेल्ने अखिल नेपाल फुटबल संघ (एन्फा)ले जनाएको छ।
मैत्रीपूर्ण फुटबल म्याच खेल्ने तीन देशले प्रस्ताव गरेका छन्। नेपाललाई बंगलादेश, लाओस र ब्रुनेइले प्रस्ताव गरेको जनाइएको छ। खेल आउँदो सेप्टेम्बर महिनामा हुने भनिएपनि आधिकारिक मिति भने तय भइसकेको छैन।
आर्थिक संकटका कारण अन्य देशमा जान नसकिने हुँदा मैत्रीपूर्ण खेल नेपालमै हुने प्रवल सम्भावना रहेको छ। नेपालले गत जुनमा एएफसी एसियन कप छनोटमा सहभागिता जनाएको थियो।
कुवेतमा भएको छनोटमा नवयुग श्रेष्ठको कप्तानीमा रहेको नेपाल अंकविहीन बनेको थियो। समूह ए मा रहेको नेपाल समूहको पुछारमा रहेको थियो। छनोटको पहिलो खेलमा नेपाल जोर्डनसँग २–० ले पराजित भएको थियो।
दोस्रो खेलमा आयोजक कुवेतसँग ४–१ गोल अन्तरले हारेको नेपाल अन्तिम खेलमा इन्डोनेसियासँग ७–० गोल अन्तरले पराजित भएको थियो। यो प्रतियोगिता सिनियर १० खेलाडीले खेलेका थिएनन्।
एसियन कप छनोट प्रतियोगितापछि नेपालले कुनै पनि अन्तर्राष्ट्रिय म्याच खेलेको छैन। टिमका मुख्य प्रशिक्षक अब्दुल्लाह अलमुताइरी बिरामी बिदामा अहिले कतारमा रहेका छन्। एन्फामा नयाँ नेतृत्व आएयता नेपाली पुरुष र महिला टोलीले कुनै पनि अन्तर्राष्ट्रिय प्रतियोगिता खेलेका छैनन्।
नेपाली महिला टिमले आगामी भदौ तेस्रो साता नेपालमै हुने साफ च्याम्पियनसिप खेल्दैछ। एन्फाको नयाँ नेतृत्वले प्रशिक्षकसँगको विवादमा राष्ट्रिय टिमबाट निकालिएका खेलाडीलाई फिर्ता बोलाउने निर्णय गरिसकेको छ।
टिमको व्यवस्थापनको विषयलाई लिएर अल्मुताइरीले उपकप्तान रोहित चन्दसहित १० खेलाडीलाई राष्ट्रिय टिमबाट बाहिर निकालेका थिए। उनले खेलाडीलाई समर्थन गरेको आरोपमा नियमित कप्तान किरण चेम्जोङलाईसमेत राष्ट्रिय टिमबाट बाहिर राखेका थिए।
सिनियर खेलाडी रोहितसहित सुजल श्रेष्ठ, अनन्त तामाङ, सुमन लामा, विशाल राई, विमल घर्तिमगर, दिनेश राजवंशी, विशाल श्रेष्ठ र अन्जन विष्टलाई टिमबाट निकालिएको थियो। अब यी खेलाडीले मैत्रीपूर्ण खेल्ने सम्भावना प्रवल छ।