काठमाडौं।
टी–२० सिरिजअन्तर्गत वेष्ट इण्डिजसँगको चौथो खेल भारतले ५९ रनले जितेको छ। यससँगै रोहित शर्माको कप्तानीमा भारतले अर्को सिरिज जितेको छ। पाँच खेलको शृङ्खलामा एक खेल बाँकी छँदै चौथो खेलमा भारतले ३–१ को अग्रता लिएको छ। टोलीको जितपछि रोहित निकै खुसी देखिएका छन्।
खेलपछिको प्रस्तुति समारोहमा खेलको बारेमा कुरा गर्दै रोहितले भने, ‘यो खेलमा हामीले खेलेको तरिका राम्रो थियो। पिज सजिलो थिएन तर राम्रो स्कोर थियो। हामीले कसरी ब्याटिङ गर्यौँ भन्नेमा धेरै सोचाइ राखिएको थियो र त्यो देख्दा राम्रो लाग्यो। पिच धेरै स्लो थियो। हाम्रा बलरहरूले फाइदा उठाए। मलाई लाग्छ यो राम्रो स्कोर थियो तर वेष्ट इण्डिजको ब्याटिङ अर्डरमा कुनै पनि स्कोर सुरक्षित छैन। हामीले जितका लागि राम्रो क्रिकेट खेल्यौं। ब्याट्सम्यानहरू साँच्चै स्मार्ट थिए र बलरहरूले विकेट लिनको लागि जोडीमा बलिङ गर्थे। यसले वेष्ट इण्डिजको गोलमा ब्रेक लगायो।’
लगातार दुई खेलमा खराब प्रदर्शन गर्दै उत्कृष्ट कमब्याक प्रदर्शन गरेका आवेश खानलाई प्लेयर अफ द म्याच घोषित भएका थिए। आवेश खानको सन्दर्भमा भारतीय कप्तान शर्माले थपे, ‘हामीले आवेशको प्रतिभा बुझेका छौं। कसैको एक वा दुई खराब खेल हुन सक्छ, तर हामी उसको सीपलाई दिमागमा राख्न चाहन्छौं। हामी केटाहरूलाई बीचमा पर्याप्त समय दिन चाहन्छौं। उसले अवस्था र उसको उचाइ वास्तवमै राम्रोसँग प्रयोग गरेको छ। जुन हेर्नको लागि उत्कृष्ट थियो।’
यसबाहेक रोहितले गर्मीको बावजुद फ्लोरिडामा खेलको मजा लिन आएका फ्यानहरूलाई पनि धन्यवाद दिए। चौथो खेलमा भारतले दिएको १ सय ९२ रनको लक्ष्य पछ्याएको वेष्ट इण्डिजले १९.१ ओभरमा सबै विकेट गुमाएर १ सय ३२ रन मात्र बनाउन सक्यो। उसका लागि कप्तान निकोलस पूरन, रोभम्यान पावेलले २४/२४, शिमरोन हेटमायरले १९, कायल मेयर्सले १४, जेसन होल्डर र ब्रेण्डन किंगले १३/१३ रन बनाए।
बाँकी ब्याटरले दोहोरो अंकमा समेत रन बटुल्न सकेनन्। भारतका लागि अर्शदीप सिंहले ३, आवेश खान, रवि विश्नोई र अक्षर पटेलले समान २–२ विकेट लिए । त्यसअघि अमेरिकाको लाउडरहिलस्थित सेन्ट्रल ब्रोवार्ड क्षेत्रीय पार्क स्टेडियम टर्फ मैदानमा टस हारेर ब्याटिङको मौका पाएको भारतले निर्धारित २० ओभरमा ५ विकेट गुमाएर १ सय ९१ रन बनाएको थियो।
उसका लागि ऋषभ पन्तले ४४, कप्तान रोहित शर्माले ३३, सञ्जु सामसनले अविजित ३०, सूर्यकुमार यादवले २४, दीपक हूडाले २१ र अक्षर पटेलले नटआउट २० रन बनाए। वेष्ट इण्डिजका लागि अल्जारी जोसेफ, ओबेद म्याक्योले २–२ र अकिल हुसेनले १ विकेट लिए। यो जितसँगै पाँच खेलको सिरिजमा भारतले ३–१ को अग्रता लिएको छ। दुई टोलीबीचको पाँचौं तथा अन्तिम टी–२० म्याच आइतबार हुनेछ।