फाइनलमा भारतसँग खेल्नुअघि यस्तो भन्छन् नेपाली प्रशिक्षक

काठमाडौं।

श्रीलंकामा जारी साफ यू–१७ च्याम्पियनसिप फुटबलको फाइनलमा नेपाल र भारत खेल्दै छन्। कोलम्बोको रेस कोर्स ग्राउण्डमा भोलि बुधबार हुने फाइनलमा नेपालले भारतको सामना गर्नेछ। यी दुई देशबीचको फाइनल खेल राति ८ः१५ बजेदेखि सुरु हुनेछ।

फाइनल म्याच खेल्नुअघि नेपाली राष्ट्रिय यू–१७ फुटबल टिमका मुख्य प्रशिक्षक उर्जन श्रेष्ठले प्रतिक्रिया दिएका छन्। उनले भारतविरुद्धको फाइनल खेल कठिन हुने बताएका छन्।

श्रीलंकामा जारी साफ यू–१७ च्याम्पियनसिप फुटबलको फाइनल अघि मंगलबार आयोजित प्रि(म्याच कन्फरेन्समा बोल्दै मुख्य प्रशिक्षक श्रेष्ठले फाइनल खेल कठिन हुने बताएका हुन् । ‘हिजो भारतले बंगलादेशविरुद्ध उत्कृष्ट खेल्यो। नेपालले पनि उत्कृष्ट खेल्यो। हाम्रो कप्तान टिममा फर्किएका छन्। मलाई लाग्छ फाइनल खेल कठिन खेल हुनेछ,’ मुख्य प्रशिक्षक श्रेष्ठले भने।

प्रतियोगिताको पहिलो सेमिफाइनलमा भारतले बंगलादेशलाई २–१ ले हराएको थियो। दोस्रो सेमिफाइनलमा नेपालले आयोजक श्रीलंकालाई ६–० ले हराएर भारतसँगको भेट पक्का गरेको हो । प्रशिक्षक श्रेष्ठले फाइनल खेल अघिल्ला खेलजस्तै महेनत गरेर खेल्ने बताएका छन्।

उनले फाइनलका लागि टिम तयार भएकोसमेत बताएका छन्। ‘खेलाडीहरू पूर्ण फिट छन्। कप्तान फर्किएका छन्। खेलाडीले आफ्नो प्राकृतिक खेल खेलिरहेका छन्। फाइनल खेल टिम गेमको रूपमा खेल्छौं, महेनत गरेर खेल्छौं,’ मुख्य प्रशिक्षक श्रेष्ठले थपे ।

प्रतियोगितामा नेपाल अपराजित रहँदै फाइनल पुगेको हो। भारतले भने समूह चरणमा एक हार व्यहोरेको थियो। नेपालले समूह चरणमा भारतलाई ३–१ गोल अन्तरले हराएको थियो। बुधबार नेपाल त्यहीँ जितलाई कायम राख्दै उपाधि उचाल्न चाहन्छ। भारत भने नेपालविरुद्ध समूह चरणमा व्यहोरेको हारको बदला लिने योजनामा छ।

साफमा पाकिस्तानको शानदार जित, यस्तो बन्यो अंक तालिका

पाकिस्तानले नेपालमा जारी छैटौं संस्करणको महिला साफ च्याम्पियनसिप फुटबलमा पहिलो जित निकालेको छ । मंगलबार भएको खेलमा माल्दिभ्सलाई ७-० गोल अन्तरले हराउँदै पाकिस्तानले पहिलो जित निकालेको हो ।

त्रिपुरेश्वरस्थित दशरथ रंगशालामा पाकिस्तानलाई जित दिलाउन नाडिया खानले ह्याट्रिकसहित ४ गोल गरिन् । यस्तै रामिन फारीद, खादिजा काज्मी र अनमुल हिराले एक एक गोल गरिन् । ३९औं मिनेटमा रामिनले गोल गर्दै पाकिस्तानलाई सुरुआती अग्रता दिलाएकी थिइन् ।

खेलको ४८ औं मिनेटमा काज्मीले पेनाल्टीमा गोल गर्दै पाकिस्तानलाई २-० को अग्रता दिलाईन् । ५३ औं मिनेटमा नाडियाले गोल गरेपछि पाकिस्तान ३-० ले अघि रह्यो ।

खेलको ७८ औं मिनेटमा नाडियाले व्यक्तिगत दोस्रो गोल गर्दै पाकिस्तानलाई ४-० को अग्रता दिलाईन् । खेलको ८४ औं मिनेटमा नाडियाले ह्याट्रिक पूरा गर्दै पाकिस्तानलाई ५-० गोलको अग्रता दिलाइन् । खेलको ९०औं मिनेटमा नाडियाले व्यक्तिगत चौंथो गोल गर्दै पाकिस्तानलाई ६-० को अग्रता दिलाइन् ।

त्यसपछि खेलको इन्जुरी समयमा अनमुलले गोल गरेपछि पाकिस्तान ७-० ले विजयी भयो । यस जितसँगै पाकिस्तानले महिला साफको सुखद अन्त्य गरेको छ । पाकिस्तानले अन्तराष्ट्रिय फुटबलमा आठ वर्षपछि जित निकालेको हो ।

समूह ए को पाकिस्तानले ३ खेलमा ३ अंक जोड्यो । तर, पाकिस्तानले सेमिफाइनलमा स्थान बनाउन सकेन । माल्दिभ्स भने जित विहीन घर फर्किएको छ । अंक विहीन माल्दिभ्स समूहको पुछारमा रह्यो ।

यस समूहबाट भारत र बंगलादेश सेमिफाइनलमा प्रवेश गरिसकेको छ। यसै समूहको अन्तिम खेलमा आजै भारत र बंगलादेशबीच प्रतिस्पर्धा हुनेछ। यस खेल साँझ ५:३० बजे सुरु हुनेछ। यस खेलपछि समूह विजेता र उपविजेता तय हुनेछ।

नेपालले  महिला साफ च्याम्पियनसिप फुटबलको सेमिफाइनलमा स्थान बनाइसकेको छ। सोमबार भएको समूह चरणको अन्तिम खेलमा श्रीलंकालाई ६-० गोलको फराकिलो जित निकाल्दै नेपालले अन्तिम चारको यात्रा तय गरेको हो। प्रतियोगितामा आयोजक नेपाल, भारत, श्रीलंका, भुटान, बंगलादेश, पाकिस्तान र माल्दिभ्सको सहभागिता रहेको छ ।

Leave A Reply

Your email address will not be published.