काठमाडौं।
फ्रेन्च क्लब पेरिस सेन्ट जर्मेन (पीएसजी) ले च्याम्पियन्स लिग फुटबलमा लगातार दोस्रो जित निकालेको छ। समूह चरण अन्तर्गत बुधबार राति माक्काबी हाइफालाई ३-१ गोल अन्तरले हराउँदै पीएसजीले दोस्रो जित निकालेको हो ।
पीएसजीले एक गोलको अग्रता उल्टाएर जित निकालेको हो । खेलको २४ औं मिनेटमा चेरीले गोल गर्दै हाइफालाई सुरुआती अग्रता दिलाएका थिए ।
तर, ३७ औं मिनेटमा लियोनल मेस्सीले गोल गर्दै पीएसजीलाई १-१ गोलको बराबरीमा ल्याए । ६९ औं मिनेटमा केलियन एमबाप्पेले गोल गर्दा पीएसजी २-१ ले अघि रह्यो ।
त्यसपछि खेलको ८८ औं मिनेटमा नेयमारले गोल गर्दा पीएसजी ३-१ ले विजयी भयो । यस जितसँगै पीएसजीले २ खेलबाट ६ अंक जोडेको छ ।
समूह ‘एच’ को पीएसजी शीर्ष स्थानमा रहेको छ।हाइफाको यो लगातार दोस्रो हार हो । अंकविहीन हाइफा पुछारमा रहेको छ।
म्यान्चेस्टर सिटीको जित
इंग्लिस क्लब म्यानचेस्टर सिटीले च्याम्पियन्स लिग फुटबलमा लगातार दोस्रो जित निकालेको छ । समूह चरण अन्तर्गत बुधबार राति भएको खेलमा बोरुसिया डर्टमण्डलाई २-१ गोल अन्तरले हराउँदै सिटीले दोस्रो जित निकालेको हो ।
रोमान्चक खेलमा सुरुआती एक गोलको अग्रता उल्टाएर सिटीले जित निकालेको हो । खेलको ५६ औं मिनेटमा जुड वेलीङघमले गोल गर्दै डर्टमण्डलाई अग्रता दिलाएका थिए ।
तर, खेलको ८० औं मिनेटमा जोन स्टोन्सले गोल गर्दै सिटीलाई १-१ गोलको बराबरीमा ल्याए । त्यसपछि खेलको ८४ औं मिनेटमा एर्लिङ हालाण्डले पूर्व क्लबविरुद्ध गोल गर्दै सिटीलाई २-१ को जित दिलाए ।
यस जितसँगै समूह ‘जी’ को सिटीले २ खेलमा ६ अंक जोडेको छ । सिटी समूहको शीर्ष स्थानमा रहेको छ । डर्टमण्ड ३ अंक जोडेर दोस्रो स्थानमा रहेको छ ।
यसैगरी इंग्लिस क्लब चेल्सी च्याम्पियन्स लिग फुटबलमा बराबरीमा रोकिएको छ । समूह चरण अन्तर्गत बुधबार राति चेल्सीले अष्ट्रियन क्लब आरबी साल्जवर्गसँग १-१ गोलको बराबरी खेलेको हो ।
घरेलुु मैदानमा सुरुआती एक गोलको अग्रता जोगाउन नसक्दा चेल्सीले अंक बाड्नु परेको हो । खेलको ४८ औं मिनेटमा रहिम स्ट्रर्लिङले गोल गर्दै चेल्सीलाई सुरुआती अग्रता दिलाएका थिए ।
तर, खेलको ५७ औं मिनेटमा नोः ओकाफोरले गोल गर्दै साल्जवर्गलाई १-१ गोलको बराबरीमा ल्याएका थिए । यस बराबरीसँगै चेल्सीले पहिलो अंक जोडेको छ ।
चेल्सीका नवनियुक्त मुख्य प्रशिक्षक ग्राहम पोटरको यो पहिलो खेल समेत हो । समूह ‘ई’ को चेल्सीले २ खेलमा १ अंक जोडेको छ । चेल्सी समूहको पुछारमा रहेको छ । साल्जवर्ग २ खेलमा २ अंक जोडेर तेस्रो स्थानमा रहेको छ ।