काठमाडौं।
नेपाली राष्ट्रिय फुटबल टिमले आज मंगलबार दक्षिण एसियाली प्रतिद्वन्दी बंगलादेशविरुद्ध एक मैत्रीपूर्ण खेल खेल्दैछ। घरेलु मैदान दशरथ रंगशालामा नेपालले फिफा इन्टरनेसनल विन्डो अन्तर्गत बंगलादेशविरुद्ध मैत्रीपूर्ण खेल खेल्न लागेको हो।
नेपाल र बंगलादेशबीचको खेल साँझ ५ः३० बजे सुरु हुनेछ।
घरेलु भूमिमा नेपाल बंगलादेशलाई हराएर समर्थकलाई दशैंको उपहार दिन चाहन्छ । नेपाली टोलीका कार्यवाहक मुख्य प्रशिक्षक प्रदिप हुमागाईले बंगलादेशविरुद्ध जितकै लागि खेल्ने बताएका छन् ।
बंगलादेश पनि नेपाललाई हराएर मैत्रीपूर्णमा लगातार दोस्रो जित निकाल्न चाहन्छ । बंगलादेश कम्बोडियासँग एक मैत्रीपूर्ण खेल खेलेर नेपाल आएको हो । उसले मैत्रीपूर्णमा कम्बोडियालाई १-० गोल अन्तरले हराएको थियो ।
बंगलादेशविरुद्धको ‘हेड टु हेड’ मा नेपाल निकै पछि रहेको छ।नेपालले बंगलादेशविरुद्ध हालसम्म २४ पटक प्रतिस्पर्धा गरेको छ । जसमा बंगलादेशले १२ खेल जितेको छ भने नेपालले ७ खेल मात्रै जितेको छ। ५ खेल बराबरीमा सकिएको छ ।
सन् १९८३ मा नेपालले बंगलादेशसँग पहिलो पटक खेलेको थियो । मर्डेका कपमा नेपाल बंगलादेशसँग १–० गोल अन्तरले पराजित भएको थियो ।
नेपालले पछिल्लो पटक बंगलादेशविरुद्ध गत वर्षको असोजमा खेलेको थियो । माल्दिभ्समा आयोजना भएको साफ च्याम्पियनसिप फुटबल अन्तर्गतको त्यस भेटमा नेपाल र बंगलादेशले १-१ गोलको बराबरी खेलेको थियो ।
उक्त खेलमा सुमन रोजाको गोलबाट बंगलादेशले अग्रता लिएको थियो । तर, अन्जन विष्टले पेनाल्टीबाट गोल गर्दै नेपाललाई बराबरीमा ल्याएका थिए । त्यसको करिब एक वर्षपछि नेपालले बंगलादेशसँग खेल्न लागेको हो ।
नेपालले पछिल्लो पटक घरेलु मैदानमा बंगलादेशलाई हराएको थियो, थ्री नेसन्स कपमा । २०७७ चैत १६ गते त्रिपुरेश्वरस्थित दशरथ रंगशालामा नेपालले बंगलादेशलाई २-१ ले हराएर थ्री नेसन्सको उपाधि जितेको थियो । अखिल नेपाल फुटबल संघ (एन्फा)ले मैत्रीपूर्ण खेलका लागि फरक फरक टिकट दर राखेको छ। टिकट भने अनलाइन नभइ भौतिक रुपमा नै बिक्री हुनेछ।
एन्फाले सामान्य प्यारापिटतर्फ ५०० र भीआईपीतर्फ १ हजार र ५ हजारको टिकट दर तोकेको हो। नेपाल र बंगलादेशबीचको खेलको प्रत्यक्ष प्रशारण हुनेछ। खेलको प्रत्यक्ष प्रशारण एक्सन स्पोर्ट्स एचडीले गर्नेछ।
नेपालको सम्भावित सुरुवाती–११ : किरण चेम्जोङ (कप्तान/गोलकिपर), रोहित चन्द, अनन्त तामाङ, रेजिन धिमाल, सुमन अर्याल, सुजल श्रेष्ठ, एरिक विष्ट, तेज तामाङ, अन्जन विष्ट,मनीष डाँगी र विमल घर्तीमगर।